बाँच्ने रहर

मैले बाँच्नु छ
यो धरतीमा
मेरा प्रिय शत्रुहरुका लागि ।

…

निथ्रुक्कै भिज्ने मन छ, हिलो छ्यापिएर
कुरुप हुने रहर छ, मोसो पोतिएर
र, खुशी पार्नुछ मैले
मेरा प्रिय वैरीहरुलाई ।

…

निर्मम दागिने ईच्छा छ, बन्दुकको मोहरीले निधारमा
क्षतविक्षत छरिने चाहना छ, बमको छर्रासंगै सडकभरी
जितको तक्मा पहिर्याईदिनुछ मैले
मेरा प्रिय दुस्मनको छात्तिमा ।

…

मेरा प्रिय शत्रुहरुलाई
एक्लै छाडेर, युद्ध मैदानमा
मृत्यु रोज्ने छूट छैन मलाई

…

र, त, मैले बाँच्नु छ
यो धरतीमा
मेरा प्रिय शत्रुहरुका लागि ।